MADIWANI RUNGWE WASUSIA POSHO, WADAI MALIMBIKIZO YA MIEZI MINNE YA POSHO YA MWEZI

 Na Moses Ng’wat, Rungwe.

 MADIWANI wa Halmashauri ya Rungwe

 wamesusia posho ya kikao cha kupitia na kujibu hoja za

 Mkaguzi na Mdhibiti Mkuu wa Hesabu (CAG ) kwa madai kuwa

 Mkurugenzi Mtendaji wa Halmashauri hiyo, Loema Peter,

 amezipunguza bila kuwafahamisha.

 Madiwani hao 38  wamegomea posho

 ya shilingi  100000  wakitaka kulipwa posho ya

 awali shilingi 150,000, huku wakilalamikia kutolipwa

 malimbikizo ya posho ya mwezi ambayo hawajalipwa kwa miezi

 minne.

 Tukio hilo lilitokea muda mfupi baada

 ya kikao hicho kilichosimamiwa na Mkuu wa Mkoa, Amos

 Makalla, kumalizika ambapo madiwani hali walikataa kusaini

 kiasi hicho wakidai ni pungufu tofauti na walivyokuwa

wakilipwa awali.

 Mwenyekiti wa Halmashauri hiyo, Ezekiel

 Mwakota, alikiri kususia posho hiyo , huku akisisitiza ni

 haki ya Madiwani kwa kuwa hawakupewa taarifa kama kuna

mabadiliko katika utaratibu mpya wa malipo ya posho za

 Madiwani.

 

 “Suala hilo linajadiliwa kwenye

 vikao, ni haki yao Madiwani kutochukua kiasi hicho cha fedha

 kwani hawakuwa na taarifa yeyote ya mabadiliko, lakini

 ukweli ni kwamba kuna mabadiliko posho za Madiwani

 wanahitaji ufafanuzi”.

 Mwakota aliongeza kuwa, Madiwani

 wanalipwa posho ya mwezi kutokana na makusanyo ya mapato ya

 ndani, hivyo kwa kipindi cha miezi mitatu wameshindwa

 kulipwa kutokana na kusuasua kwa ukusanyaji.

 “Ni kawaida jambo hili hapa Rungwe ni

 la muda mrefu na ni kama utaratibu tuliojiwekea kuwa,

 Madiwani wawe wa mwisho kulipwa…huwezi kulipa Madiwani

 kwanza wakati kuna watendaji wengi hawajalipwa”.

 Aliongeza kuwa suala hilo linaendelea

 kujadiliwa na Madiwani hao watalipwa madai yao yote ndani ya

 muda mfupi, hasa kwa fedha za mwezi Mei na Juni kwa kuwa

 mchakato wa fedha hizo tayari umefikia hatua nzuri.

 Mkurugenzi Mtendaji wa Halmashauri

 hiyo, Loema alipoulizwa juu ya tukio hilo hakuwa tayari

 kulizungumzia na kusema suala hilo halijafika kwake.

Mwisho.